• Home
    • /
  • Муҳиддин Кабирӣ: Эмомалӣ Раҳмонро Трибунали байналмилалии ҷиноятӣ интизор аст

Муҳиддин Кабирӣ: Эмомалӣ Раҳмонро Трибунали байналмилалии ҷиноятӣ интизор аст - pmtj.org

Хабарҳои сиёсӣ

Муҳиддин Кабирӣ: Эмомалӣ Раҳмонро Трибунали байналмилалии ҷиноятӣ интизор аст

Admin February 25, 2026 0 Comments
Ҳафтаи гузашта дар Литва раҳбари Паймони миллии Тоҷикистон Муҳиддин Кабирӣ бо рӯзномаи маҳаллии «Vakarų žinios» мусоҳиба анҷом дод.
Дар ин суҳбат ӯ ҳам аз ҳадафҳои сафараш ба Литва гуфт ва ҳам аз арзёбии худ нисбат ба вазъи сиёсии Тоҷикистон ва дурнамои муборизаи мухолифин ҳарф зад.
Ба гуфтаи Кабирӣ, сафари ӯ ба Литва танҳо хусусияти рамзӣ надошт. Ӯ ният дошт бо муҳоҷирони тоҷик мулоқот кунад, дар форуми «Русияи озод» иштирок намояд ва бо намояндагони ниҳодҳои расмии ин кишвар, аз ҷумла Вазорати корҳои хориҷӣ ва Парлумони Литва дидору гуфтугӯ анҷом диҳад. Ба таъкиди ӯ, чунин тамосҳо барои ҷалби таваҷҷуҳи ҷомеаи байналмилалӣ ба масъалаи Тоҷикистон аҳаммияти калидӣ доранд.
Дар идомаи мусоҳиба Кабирӣ ба саволи рӯзноманигор дар бораи стратегияи мухолифин посух дода, гуфт, ки яке аз ҳадафҳои асосии онҳо расондани паёми равшан ба ҷомеаи ҷаҳонӣ мебошад.
Ба гуфтаи ӯ, мухолифин талош доранд, то дар сатҳи байналмилалӣ ба ҳукумати кунунии Тоҷикистон арзёбии сиёсӣ дода шавад.
Кабирӣ изҳор дошт, ки ба назари ӯ вазъи озодиҳои сиёсӣ ва расонаӣ дар Тоҷикистон рӯ ба бадшавӣ дорад. Ӯ таъкид кард, ки фазои иттилоотӣ дар кишвар маҳдуд шудааст ва расонаҳои мустақил амалан аз фаъолият бозмондаанд.
Ба гуфтаи вай, фишорҳо танҳо ба фаъолони сиёсӣ маҳдуд намешаванд.
Ӯ дар мисоли шахсии худ гуфт, ки дар остонаи интихобот ба хонаводааш низ фишор ворид шудааст. Ба гуфтаи Кабирӣ, чунин иқдомҳо бо ҳадафи боздоштани фаъолияти сиёсии ӯ сурат мегиранд, аммо ӯ таъкид кард, ки ин гуна фишорҳо иродаи ӯро тағйир нахоҳанд дод.
Яке аз нуқтаҳои муҳими мусоҳиба масъалаи эҳтимоли пайгирии ҳуқуқии байналмилалӣ алайҳи Эмомалӣ Раҳмон ва атрофиёнаш буд. Кабирӣ гуфт, мухолифин дар самти ҷамъоварии ҳуҷҷатҳо кор мебаранд ва ба гуфтаи ӯ, аллакай ҳаҷми зиёди мавод беш аз ҳазор саҳифа гирд оварда шудааст, ки нақзи ҳуқуқи инсонро дар Тоҷикистон нишон медиҳад. Ӯ эҳтимолро истисно накард, ки дар оянда масъалаи баррасии қазия дар сатҳи байналмилалӣ матраҳ шавад.
Дар баробари ин, раҳбари Паймони миллӣ ба нишонаҳои зуҳури норозигӣ дар дохили элитаи ҳоким низ ишора кард. Ба гуфтаи ӯ, дар дохили низом ихтилофҳо афзоиш ёфта, қисме аз мансабдорон аз самти рушди кишвар нигарон шудаанд.
Дар фарҷоми суҳбат Муҳиддин Кабирӣ таъкид намуд, ки мухолифин муборизаи сиёсии худро идома хоҳанд дод ва аз ҷомеаи байналмилалӣ хост, вазъи Тоҷикистонро нодида нагирад.

Tags:

Share:

НАВТАРИН

Ховари Миёна пас аз пирӯзии Эрон

April 9, 2026

ЭЪЛОМИЯИ ПАЙМОНИ МИЛЛИИ ТОҶИКИСТОН ДАР БОРАИ ТАҒЙИРОТИ

April 6, 2026

Паёми табрикотии Паймони миллии Тоҷикистон ба муносибати

March 19, 2026